মুখ্য পৃষ্ঠা
06/04/25
14:52
মৰমৰ তাজমহল
তাজমহল
দেখিছিলো সিদিনা সপোনত ,
দেখিছিলো অযুত মমৰ পোহৰ |
আৰু বুৰঞ্জীৰ পৃষ্ঠাত
এটি যুগমীয়া প্ৰেম |
টুপাল টুপাল সৰিছিল মমতাজৰ
চকুলো !
যিদিনা তুমি সপোনত সুধিছিলা ,
কেনে আছে মোৰ বুকুৰ মণিকোঠা ?
কেনে আছে মোৰ বুকুৰ তাজমহল ?
ভুল কৰিছিলা তুমি |
বিদ্ৰুপত কঁপিছিল মোৰ সৰ্বশৰীৰ |
ছাহজাহান মই হ'ব নোৱাৰো !
সাজিব
নোৱাৰো আকাশলম্ভা তাজমহল !
লিখিব নোৱাৰো ডান্টেৰ দৰে প্ৰেমৰ
কাহিনি |
মই তোমাৰ দুৰ্ভগীয়া প্ৰেমিক |
নুসুধিবা কেনে আছে মোৰ বুকুৰ
তাজমহল |
কবৰ খান্দিব শিকিছো নিজৰ বাবে ,
বিচৰা নাই স্মৃতিত মৰমৰ সৌধ |
নালাগে জ্বলাব মোৰ সমাধিত তেজৰ
চাকি ,
নালাগে কৰিব চকুলোৰে অৰ্চনা ||
জ্বলাই থবা মাথো তোমাৰ বুকুৰ
কোঠাত ,
এটুকুৰা মম |
গলি-গলি শেষ হৈ যোৱাৰ দিনা ,
মইও শেষ হৈ আতৰি যাম !
দেখিবা , তেনেই আন্ধাৰ উৰুখা পঁজা !
পদুলিত শেৱালী জোপাৰো ফুল
নেদেখিবা |
দেখিবা তুলসী তলত এগচি চাকি ,
অথবা আইৰ এখন উকা ৰিহাৰ আঁচল |
নুসুধিবা কেনে আছে ,
মোৰ বুকুৰ তাজমহল.....||
© ৰাজু কলিতা
14/07/14
